Dia schtill Zeit

Vo Afang Dezember, oder saga mer, vom erschta Advent
bis Weihnachta, dia paar Wocha hoisst mer bei ons
dia schtill Zeit.
Der Ausdruck ischt beschtemmt scho recht alt,
aus dera Zeit wos om dia Zeit au no schtill war.
Wenn em November dia meischte Pflanza ihre
Blätter abgworfa ghet hend, dia Baura ihre Felder
auf da Wenter nagrichtet ghet hend, dr Mischt
ond dLacha ausbrocht gwea ischt,
no hend ses ruhiger ghet,
no isches schtiller worda aufem Land.
Da Schtall ond dViecher hend se natürlich äll Tag
versorga müassa wia sonscht au sganze Johr durch,
aber shot halt nemme so arg pressiert,
mer hot endlich scho amol am Morga dZeitung
richtig durchlesa könna, drnoch hot mer seine Maschena
ond s andere Handwerkszeug wieder en Schuss brocht
ond halt älles des doa, was mer en dr andera Zeit
vom Johr wega Zeitmangl net doa hot könna.
Dia Bauersleut hend jetzt au en dSchtadt fahra kenna
zum a paar wichtige Sacha eikaufa,
en Schurz, a Paar Hosaträger, en Huat,
a neus Küchesieb ond halt lauter so Sacha
wo mer emmer braucht. Wenn sletschte Johr
a guats Johr gwesa ischt, hot dr Bauer mit seira Bäuere
vielleicht sogar eikehrt em Schwana oder em Lamm,
sia hend oi, zwoi Gläsla Bier dronka ond a Batzawurscht
gessa, oder wenn se em Drei König eikehrt send,
gar dem Wirt sein oigena Moscht  probiert,
der soll recht guat gwesa sei,
natürlich net ganz so guat wia dr oigene.

Wenn am Obed älles versorgt war, dr Schtall, sHaus,
dKender ond älle andere Viecher, no send se naghocked
ond hend a bissle em Baurablättle oder em Volks- ond
Hauskalender glesa, manche wo a Radio ghet hend,
hend dFamilie Schtaudameier oder Häberle ond Pfleiderer
ghorcht bis dAuga zuagfalla send.
Des war no a richtig schtilla Zeit.

Wo ond wann gibt's dia heut no ?
Dia schtilla Zeit schpielt sich heutzutag nachts zwischa
drei ond viera ab, des aber au bloss em Wenter
bei schlechte Schtrossaverhältnis.
Ab November wirds doch emmer hektischer,
en de Gschäfter wird dWeihnachtsdekoratio abrocht,
dSchaufenschter werdet mit Chrischtbäumla beschtückt,
aNiklausfigur hot scho fascht koin Platz meh em
Fenschter, weil scho a paar andere doschtandet, ond älle
hend ihre Säck voll mit Gschenk.
Aus de Lautschprecher en de Läda kommt da liabe,
lange Dag Weihnachtsmusik dia vo Werbeagebot
onterbrocha wird, en deara schtilla Zeit.
Was en de letschte Johr wirklich
ruhiger worda ischt, des send dia Ladakassa, noi, noi,
net weilse weniger einemma deand, sondern weilse
elektronisch ganged ond deshalb koi klingla meh
zhöra ischt beim abkassiera, der Lärm wär zu arg
für dia Kassiererna, des könnted dia nemme 
aushalta, bei deane heutige Omsätz.

Jo dia schtilla Zeit, älle sehned sich drnoch,
aber kaum oiner duat ebbes drführ,
dass wenigschtens dia Zeit schtill wird.
Mer hört nämlich en dera Schtille arg viel
was oim obequem sei könnt, zum Beischpiel,
dass Honderttausende noch Brot schreied,
noch Freiheit oder ganz oifach bloss noch Leba.  

 Also macha mer a Weihnachtsschpende an irgend
a gemeinnützige Eirichtung,
kriaged onser Schpendabescheinigung
ond scho wird's ruhig en ons ond om ons rom,
oder doch net ganz?
Braucha mer glei wieder Trubl ond Hetze weil
mer sich sonscht en dera schtilla Zeit,
en deres doch net ganz so schtill ischt,
zu viele Gedanka über Probleme
von andere Menscha macht?            

 Wär so a schtille Zeit net au mol ebbes für
dia obere Verantwortliche en äller Welt,
so a schtilla Zeit, en dera so viel zu höra ischt? 
 


© Bernhard Kaufmann - alle Rechte vorbehalten